Ermal Laze, një nga punonjësit e Teatrit Kombëtar, krejt papritur ka pësuar një ishemi. Burime për Gazeta Shqiptare kanë bërë të ditur se gjendja e tij paraqitet e rëndë, ndërsa raportohet se është në koma të thellë.
Miq, kolegë, artistë, por edhe vetë ministrja e Kulturës po luten për shëndetin e tij.
“Ermali punonjës i Teatrit Kombëtar sot pësoi një ishemi. Le të lutemi që ky njeri i mrekullueshëm të jetë përsëri mes nesh. Teatri të pret”, – ka shkruar ne rrjetet sociale, Arben Derhemi.
Ndërsa ministrja e Kulturës Mirela Kumbaro, përmes një postimi në rrjetin social shkruan se nëse asnjëherë nuk i duartrokasim punëtorët e skenës, sot të lutemi për të që jeta të triumfojë!
POSTIMI I PLOTË
“Ermali, një nga heronjtë e heshtur të passkenës së Teatrit Kombëtar, që pergatisin çdo gjë për skenën, aktorët dhe regjinë, po lufton me vdekjen, pas një hemorragjie cerebrale.
Nëse asnjëherë nuk i duartrokasim punëtoret e skenës sot ftoj që të lutemi për të që jeta të triumfojë!
Mendojmë fort për ty Ermal Laze”, – shkruan ministrja Kumbaro.